روح البيت
وشغل كل الأجهزة الكهربائية إللي عندك
شغل المكنسة على آخرها، وشغل الراديو والتليفزيون بأعلى صوت
وشغل التكييف، وكمان الغسالة
وشغل المنبه، لو عندك
أقعد نص ساعة وسط الدوشة دي
ولاحظ إزاي انتباهك بيعافر مع الموجات دي،
وبيحاول يمسك في فكرة واحدة متماسكة بس مش قادر
بعد نص ساعة، إقفل الأجهزة دي كلها واحد ورا الثاني
فيه لحظة صمت، بتيجي بعد الدوشة
نوع خاص من الصمت
اقعد في الصمت ده وحاول إنك تسترخي
ساعتها هتسمع صدى غريب جاي من بعيد
الدوشة كانت عاملة زي إعصار،
بعثر ذاتك
وانت دلوقتي قاعد في السكون إللي بعد الإعصار ده
بعد شوية هتاخد بالك إن فيه كتل متماسكة،
قاعدة تظهر على سطح وعيك
الكتل دي، ماهي إلا لحظات منسية
فيه لحظات منهم إنت هتتعرف عليها، لإن هي من ماضيك
بس فيه لحظات ثانية إنت مش هتعرف مصدرها
لكن هتفضل حاسس إنها جزء منك
