ده إبراهيم ابني وهو مندمج في اللعب و التعليق على سباق السيارات
من وهو عمره يمكن ٣ سنين كان كتير يفاجئني بكلمات فصيحة بيستخدمها في حياته اليومية
زي مثلا زر بدل زرار أو قبعة بدل كاب أو مثلا السحاب بدل السوستة
كانت المفاجآت دي بتضحكني قوي
لكن كل مابيكبر مفاجآته ديه بتكشفلي عن أمور غايبة عنى فيما يخص تعلم الأطفال للفصحى
نهى محدثة نسرين: إبراهيم بتفرج كثير على كرتون بالفصحى
لاحظت انه أوقات كثيرة وهو بيلعب بلعبه بيدير الحوار بتاع القصة كلها بالفصحى
ولاحظت كمان انه في أوقات كتير و احنا بنحل الواجبات بجيب الإعراب مظبوط
يعني مرة لقيته بيقول لي شاهدت مقطعا، فقلت جابها ازاي؟
احنا قعدنا سنين على ماعرفنا أن “مقطعا” مفعول به فلازم تكون منصوبة
إنما هو كان لسة في أول تالتة ابتدائي ولسه مدخلوش في النحو جامد
نسرين: أهي بقى مقطعا دي تثبت الفشل الذريع لطرق التدريس الحالية
سرد: دي نسرين بشير أستاذة في علم اللغويات
نسرين: ليه؟
لأن لو كان المفروض إن إبراهيم لا ينتج “مقطعا” دي
غير لما يأخذ المفعول به مكانش حينتجها،
إنتاجه لـ “مقطعا” سببها الأساسي التعرض بشكل مكثف للمفعول به المنصوب
في الفيديوهات أو الكرتون اللي بالفصحى فخلاص هو فهم إنها المفروض تكون مقطعا مش مقطعٌ
رغم إن تمكن إبراهيم من الفصحى على مستوى التحدث مش بطال
الا أن مذاكرة العربي في كثير من الأوقات بتكون مؤلمة ليه و ليا
كتير كنت لاقي نفسي أخرج عن شعوري وأزعق فيه لانه مش عارف يحل الواجب
ولا حتى عارف يقرأ السؤال عشان يعمل المطلوب منه
و طبعا دي كارثة كبيرة بالنسبة لواحدة لسه بتشعر بالسعادة و الفخر
لما تفتكر أنها جابت 58 ونص من 60 في العربي في الثانوية العامة.
من أكثر الدروس اللي كانت حتخسرنا بعض أنا و إبراهيم
هي درس اللام الشمسية واللام القمريه،
بصراحة كانت معاناة
وصلتني في يوم إني أتساءل طب وإيه لازمة الدرس ده؟
حيفرق معاه ايه يعني بعدين؟
مدرسة لغة عربية: اللام الشمسية والقمرية طبعا مهمة جدا أن الطفل يتعلمها من سن صغير
لأنها بتحطلهم القواعد، زي الفتحة و الكسرة و الضمة
لو ما تعلموهاش من دلوقتي مش حيعرفرا نطق الكلمة صح
دي الاستاذة ندى محمد بتدرس عربي لطلاب المرحلة الابتدائية في إحدى المدارس الخاصة في القاهرة
مدرسة لغة عربية: ده جزء من الأساسيات الطفل لازم يتعلمها علشان يقرأ العربي قراءة صحيحة.
اللغة العربية دي لغة القرآن
مش حقول لك سهلة لا هي من أصعب المواد،
لكن مجرد إنك عرفتي القاعدة حتعرفي تطبقيها خلاص وما يبقاش عندك مشكلة.
بصراحة الكلام بتاع المدرسة ما اقنعنيش قوي
اضطريت كعادتي إني ألجأ لصديقتي نسرين
المتخصصة في علم اللغويات في إحدى الجامعا ت الأسترالية
من أول ما إبراهيم دخل أولى ابتدائي
وبدأت معاناتنا في دراسة اللغة العربية
و أنا فاتحة خط ساخن مع نسرين،
يمكن تقدر تفهمني المشكلة فين
بما إن صميم تخصصها هو تعليم اللغة العربية.
نسرين: أنا شايفة أن الوقت اللي بنقضيه في التفريق ما بين اللام الشمسية والقمرية
دا تضييع وقت ممكن نستفيد به
لو نص ساعة في أول أسبوع الطالب بيتعلم فيها اللام الشمسية واللام القمريه
النص ساعة ديه الطالب ممكن يقعد يقرأ فيها
وتكون أفيد ميت مرة من أني أقعد أقوله اللام دي شمسية ولا قمرية
ليه بقى؟
لأن الطفل اللي جاي يدخل المدرسة سواء في الحضانة أو السنة الأولى
هو أصلا عنده اكتساب كامل للغة أم
أيا كانت العامية االي هو مكتسبها قبل ما يتعلم الفصحى في المدرسة
الطالب أصلا جاي لي عارف إني بقول الشمس حلوة والكتاب كبير
أنت عارف إني لما تيجي ال مع الشين بيقول الشمس ولما تيجي ال مع الكاف بنقول الكتاب
ليه لازم يقول لي صراحة دي اسمها لام شمسية ودي اسمها لام قمرية
ايه الهدف أن الطالب يعرفهم صراحة طالما هو عارف ينتجهم
نسرين: الفكرة في اللام الشمسية و اللام القمرية
واللي مش بالضرورة كتير من الأساتذة يعرفوه
هو إن الموضوع صوتي بحت
المخرج اللفظي بتاع اللام هر حرف بيكون فيه اللسان لامس خلف الأسنان الأمامية
وهو نفس مخرج النطق بتاع الشين أو الراء أو الدال
فأي صوت من أصوات اللغة العربية
بينطق قريب من المكان اللي بتتنطق منه اللام بيكون لام شمسية نتيجة صعوبة النطق بتاع اللشمس
في حين إن حرف زي العين مخرجه من الحلق
بعيد جدا عن اللام فعلشان كده عندي مساحة إني أنقل من اللام للعين
نهى محدثة نسرين: أنا ابني قادر يقول اسمكة مش السمكة،
إنما لما بييجي قدامه تدريب ميز ايه الشمسية و ايه القمرية
بحس إن في سحابة سوداء أو غيامة سوداء جات عليه و مش قادر يجيبها بفطرته
نسرين: الطالب بيتلخبط ليه؟
كأن بالظبط حد بيعرف يركب العجلة
وبتقولي له تعال اشرح لي خطوات ركوب العجلة
فطبعا الطالب بيجد من الصعوبة الشديدة
إن حاجة عنده معرفة كاملة بيها إنه يوصفها أو يشرحها وهو مش محتاج
نسرين: في خوف على الفصحى من العامية
مع أن المفروض آخذ العامية دي على أنها شيء جالي يوفر لي وقت ومجهود
أنا مش محتاج أقضي كل الوقت ده على النحو و الصرف
نسرين: ليه أجيب الطالب في المرحلة الإعدادية أو الثانوية
واقعد أحفظه قواعد صياغة “أفعل” التفضيل
الطالب عارف أصلا إني أقول أكبر وأجمل وأصعب
من غير ما يعرف انه دي من كبُر او جمُل أو صعُب
سرد: “المقاطع الصوتية”
درس ثاني من الدروس اللي حيرتني أنا و إبراهيم
لا عرف أبدا يفهمها و لا أنا قدرت أشرحها له
لسبب بسيط جدا و هو إن عمري ما سمعت عنها في المدرسة
آه درست المقاطع الصوتية في الإنجليزي و الفرنساوي
بس مش في العربي
ويبدو إن مدرسين العربي نفسهم اتفاجئوا بيها زيي بالظبط
مدرسة العربي ضاحكة: المقاطع دي أنا لقيتها موجودة في الكتاب مرة واحدة (تضحك)
بس برضه زي ما قلتلك في الآخر بتحسن نطق الطفل
يعرف امتى بفتح بقي وامتي بضمه و امتى بكسر
سرد: بصراحة مش قادرة اقتنع قوي
عرفنا الفتحة و الضمة و الكسرة من ابتدائي من غير ما ندرس المقاطع، جت منين و ليه؟
نسرين: موضوع تقطيع الكلمات ده ظاهرة جميلة جدا
جميلة جدا ليه؟
لأن هي بتشير إلى شيء سلبي وشي إيجابي
الايجابي، هو إن ده دليل إن واضعي المناهج ابتدوا يفهموا إن في مشكلة في طريقة تدريس اللغة العربية
وشايفين احتياج لعمل شيء جديد
الوحش في الموضوع إن معالجتهم للمشكلة
هي اني أشوف ايه اللي معمول في الإنجليزي و انقله على العربي
بدون أي فهم للاختلاف الجذري بين اللغتين
مثلا اللغة الإنجليزية الاتجاه بتاع الـ phonics
هو تعليم الطالب الكلمات عن طريق نطق الأصوات
وتقسيم الكلمات إلى مقاطع اني بخلي الطالب يقول C-A-T
هو عاوز يعمل نفس الحاجة في العربي
المشكلة في الإنجليزي أولا طريقة الكتابة متفرطة
كل حرف لوحده ال حرف الساكن c sound لوحده و حرف العلة الـ A sound
والحرف الساكن ال T sound
في العربي أصوات العلة اللي هى الفتحة و الكسرة
والضمة بتقعد فوق أو تحت الحرف الساكن فأنا ما ينفش أفصلهم عن بعض
فدي أول مشكلة في تقسيم الكلمة بناء على التشكيل
المشكلة التانية انت عندك حاجة زي الشدة
دي عبارة عن سكون وفتحة أو سكون و ضمة أو سكون وكسرة
مثلا كلمة “قطة” الطالب حيقسمها ازاي؟
لو أنا حقسمها حروح قاسمة الطاء نصفين، نص مع القاف و نص مع الشدة
ماينفعش
سرد: في يونيو ٢٠٢١ أصدر للبنك الدولي تقرير خطير جدا
تقرير بيقول انه اكثر من 50% من الأطفال في العالم العربي
اللي سنهم 10 سنين غير قادرين على قراءة أو فهم نص مناسب لسنهم
طبعا دي إحصائية مرعبة وأكيد بتقول إن في حاجة غلط
نسرين: التركيز المفرط على النحو والصرف
كل ده نابع من خوف غير مبرر على الفصحى أنها تنهار
مع أن الفصحى حتنهار لو استمرينا في تدريسها بنفس الأسلوب المتبع حاليا
سرد: اللي فهمته إن كلام نسرين ده بيعبر عن اتجاه أصبح موجود بالفعل
بين عدد مش بطال من المتخصصين في تعليم اللغة العربية
لكن الأصوات المقاومة ليهم لازالت عالية جدا
نسرين: أنا مش مع إهمال القواعد،
غالبا لما حد بيتكلم و يقول ننقل التركيز على المهارات
القراءة أو الاستماع أو الكتابة أو الكلام
كتير من الأساتذة بيشوفوا دي دعوى لإهمال قواعد الفصحى
أو التركيز على الإنتاج بدون دقة
ده مش حقيقي أبدا
اللي أنا بطرحه كيفية الوصول إلي الدقة في القواعد