يمكن بتتزكري انا كنت اكتر حدا بده حفلة بتخوف يعني حفلة كبيرة عدد كبير
كنت بدي اعزم كل عشيرتي يعني ايام المدرسة كنا بنتناقش بهاد الموضوع
أقولك، لأ انا ازا ما كان الف حدا، بتتذكري الجاهة؟
وجاهتي بدها تكون ألف زلمة وكل ما كان اكتر كل ما كان هيبة كنت بدي الكل يحكي بحفلتي
كنت أقولك بدي المناسف للرُّكب، وهاد كله كوست
بوقت المدرسة عمرنا ما تخيلنا كيف الحياة رح تأثر على مفاهيمنا
أكبر مثال سوار صديقتي اللي عمرها 28 سنة
تأثرت بالمجال البيئي من 5 سنين…
بالبداية كان عملها بإعادة تدوير النفايات…
من 3 سنين كانت سوار أول صبية بالشرق الأوسط
بتحصل على شهادة للعمل بما يُسمى “الزفاف الأخضر”
– الزفاف الأخضر هو زفاف صديق للبيئة بنحاول فيه أنه نخفف من المخرجات المضرة بالبيئة،
سواء كرتون، معدن، بلاستيك،
أو أي مدخل ممكن يتحول لقمامة
بنعمل على إعادة تدويره والاستفادة منه مرة تانية
يمكن أكثر اشي صعب عنا هو إنه نقنع العروسين
بأنهم يستغنوا عن بعض المفاهيم السائدة وإحنا عم ننظم الحفل
الكارثة الكونية عنا رحمة ما بتقتصر بس على حفلة الزفاف
لأ نحن عنا سلسلة من الحفلات يعني عندك،
بتبدا مثلاً من حفلة الوداع، بحكولها، بتنادي صاحباتها وبتعمل حفلة بالبيت
بتتوسع الحنة اللي بتنادي فيها قرايبها وبكون عدد أكبر من المدعوين
بعدين العريس بتوسع بحفلة التعليلة، اللي هي زفة العريس
هون بدك تشوفي كمية دمار شامل من النفايات أول اشي التكلفة
التكلفة هاي بدك تحطيها ع جنب لانه هون، لو بدك تحسبي كل الحفلات هاي لحالها مصيبة
بتبدا أول اشي بالليل، بالليل يعني بدك حبال ضوء وإنارة مخيفة غير انها بتسكر الشارع،
بعملوها بالشوارع، وين المصيبة؟ انه الدعوة مفتوحة يعني ما بحددلك ياها مثلاً بالاقارب،
لا الجيران بسمعوا الأغاني بيجوا،
بما انه الدعوة مفتوحة أكيد هم منسقين مع محل الحلو
انه أنت بدك تيجي تنزل وتضلك تنزل طول مافي ناس عم تطلب نزل…
لما بتخلص الحفلة تعي وشوفي كمية البلاستك يلي ع الأرض،
كمية الأكل يلي ع الارض وما بتقدري حتى ترجعي تعيدي تدويره
رافقت سوار لنلتقي بالعروس إيمان
إيمان اللي عمرها 25 سنة،
هي بنت عادية بتشتغل بمجال بيع مستحضرات التجميل
عرفت سوار عن مشروع الزفاف الأخضر عن طريق معارف مشتركين مع سوار
لما عرفت سوار بخطوبتها عرضت عليها الفكرة، وهي وافقت
بعد ما تأكدت إنه المشروع ما بلغي جمالية وبهجة العرس
– إيمان احكيلي بالزبط انتي شو تصورك للحفلة؟
– هلأ أنا بحب الإضاءة تكون عالية، بحب هيك الصور تبين، حابة الكوشة تكون أبيض وأخضر
– حلو طيب شوفي الثيم رح نعتمد الأبيض والأخضر زي ما بدك بس شوي بدك تساعديني بموضوع الورد، ما رح نستخدمه طبيعي إيمان
– يعني رح يبين فرق؟ يعني لو عملناهم مكس جنب بعض؟
– حلو كتير، لأ مش رح يبين، احنا هيك رح نعمل،
الكوشة رح تكون كلها صناعي احنا عنا كوشة جاهزة،
اذا اتفقنا على الكوشة باقي الأمور كلها بتصير سهلة
طيب نبلش بالدعوات، هلا احنا بدنا نعمل الدعوات الكترونية عندك مشكلة؟
لو عملناه الكتروني؟ – ايييه -اوفرلك
-اييي يعني الكترونية وشوي بدي بعض المعازيم بدي انه يكون ورقي
-كم بدك العدد يكون
– 25
-كم العدد كامل للمدعويين للحفلة؟ – 150
– شوفي هلا رح اعملك ياهم فانسي بس بنفس الوقت بدي يكون كله recycled paper شو رايك؟
– كتير حلو
الزفاف الأخضر ما بيقتصر بس على تقليل البلاستيك والنفايات،
لا هو بيدخل بتفاصيل كتير ثانية أو منيو الطعام وطبيعة الاكل يلي رح يتقدم وكميته
وعدد المدعوين ومكان الحفل وكتير قصص
– فستانك انتي حجزتيه ولا لسا؟
– هلأ شفته بس لسا ما صار حجز
– انا بهمني اقدملك نصيحة بهاد الإشي، انتي رح تشريه ولا رح يكون أجار؟
– يعني أنا حابة اشتريه بس يعني لسا
– لا شوفي أنا بنصحك تستاجيريه. حيكون اشي دفعتي فيه بس ما رح تستخدميه بعدين
اييييه بدك تعملي زفة لما تدخلي؟
– أكيد طبعا، الزفة مستحيل خطيبي يستغني عنها
– انتي اقترحي عليه نحطلك ميوزك كلاسيك على الدخلة، أحلى بكتير من الزفة والقصص هاي
– بحاول أقترح عليه
رح تستغربي إنه في شغلات إنه ليه إحنا عم نحكي فيها
حتى الشغلات البسيطة، بيئياً ممكن تكون عم تكلفني كثير
من أهم الفلسفات بالبيئة أو بالزفاف الأخضر هو تقليل التكلفة
– رح تطلعوا فاردة؟
– اكيد طبعا
سمعنا كلمة فاردة. الفاردة هي طقس متعارف عليه بالأفراح في الأردن
وهو موكب من عشرات السيارات يلي بتستعرض سرعتها مع أصوات الزوامير
بترافق العرسان من البيت لمكان الزفاف أو العكس
– يعني انتي عم تحكي عن 150 شخص مدعو،
يمكن أنا عم احكي من منطلق بيئي هاي السيارات عم تطلع تلوث بالهوا
اقولك يمكن انتي عم بتشوفي أي حدا عم يطلع فاردة عم بصير فيه قصص،
فأنا بقترح موضوع الفاردة انكم تلغوه وبنعملكم اشي حلو
– هلأ شوفي انا حابة الفاردة، بس هاد القرار كمان مش قراري، بس اقنعتيني صراحة
ازا رح تحكيله هيك رح يقتنع أكيد. – خلص تمام
ولأني بعرف سوار منيح. كنت متأكدة إنها رح تبذل مجهود في إنها تقنع العريس يلغي الفاردة
بس الموضوع أبدا مش سهل. لأنه عادةً الشباب بكون عندهم كثير حماس للفاردة
– مرحبا محمد كيفك؟ حابة أعرف شو صار معك بخصوص الزفة و الفاردة والأكل؟ بتمنى يكون في أخبار حلوة
– مرحبا، كيفك سوار ؟ بخصوص الاكل اعملي اللي بدك ياه انتي انا بالنسبة الي ما بيفرق معي كتير موضوع الأكل
لكن فكرت بموضوع الفاردة الصراحة يعني فكرت فيها كلامك منطقي
وامي كمان ما تشجعت بالنسبة للموضوع وبتعرفي انتي كمان صحابي مشاعيط وهيك
وما بدنا يصير مشاكل عشان هيك رح امشي على رأيك خلص مافي داعي للفاردة
أما بالنسبة للزفة لا هاي الشغلة الوحيدة يلي ما بقدر يعني لازم يكون في لأنه بدونها الحفلة ما بتحلى، فهمتي كيف!
– ممتاز هلا مكسب كبير لإلنا أنه منعنا الفاردة
شوفي الحفله رح تكون ب 16 الشهر وحجزنا مزرعة ب تولد على الطاقة الشمسية عشان تولد الكهربا
بخصوص الورد انا متفقة مع صبية اسمها ميسون، بتعمل دايما إعادة تدوير للورد ورح يضل في بواقي من الورد
يلي رح تستخدمه، فتواصلت مع صاحب المزرعة وخبرته انه البستنجي يستخدمهم مع التربة وهيك بنكون ضربنا عصفورين بحجر واحد
اليوم هو اليوم المنشود. زفاف أخضر لإيمان على محمد في مزرعة مزودة بالطاقة الشمسية. مع زفة لكن بدون فاردة
– هدول كلهم الفازات اللي بنستخدمهم كاملة من محلات سكند هاند
عشان بنقلل التكلفة وبنشجع هاي المحلات كمان الناس تصير تاخذ منها. كتير قطع حلوة
– يعني مستعملة قصدك؟
– مستعمل اه. بنقلل التكلفة وبنشجع هاي المحلات فيصير هذا نمط حياة
– يعني مش كلياته اشياء قديمة في اشياء جديدة وغريبة
هلأ بلشت ملامح تجهيز المكان. العمال عم يشتغلوا بتجهيز ال Dance floor
الطاولات مهجورة من البلاستيك
هدايا المعازيم هي زريعة بأنواع مختلفة من الصباريات اللي ما بتحتاج كتير مي وعناية،
مزروعين بقوالب من الجبس ومزينين بطريقة ملفتة
الكوشة بالفعل من الورد الصناعي، وفازات الورد جمعت بين الطبيعي والصناعي، وأنا كشخص مش خبير بالورد ما فرقت كتير بينهم
– بصراحة متحمسة كتير نص ساعة وبيوصلوا المعازيم وكل اشي صار جاهز، وغير هيك متحمسة لاشوف ردة فعل الناس على الزريعة