أنا بهيج وردة الثالث. لو اخترت اكتب اسمي لعند الجد السادس كان حيكون اسمي بهيج إبراهيم بهيج إبراهيم بهيج وردة.
وبالتالي رح كون بهيج الثالث لكن ح يكون الاسم كتير طويل.
بالحقيقة ما كان عندي مشكلة، بس المشكلة كانت عندي والدي لما قرر يسميني.
الوالد كان ناوي يسميني آرام تيمناً بالحضارة الآرامية العظيمة، بس اضطر يأجل الاسم لأخي الأصغر اللي ولد بعدي ب 4 سنوات لأنو جدي زعل
هددو بالمقاطعة، ومتل كل شخص شرقي مليان بالحنين بعد سنوات من الاغتراب والدراسة بالخارج غير رأيه.
وهيك فوّت عليّ جدي فرصة اني أحمل اسم تاريخي، بس بنفس الوقت منحني الاسم الكثير من امتيازات الحفيد الحامل لاسم الجد، ابن الولد البكر.
رغم كل شي سبق بس ما هذا ما بيعني أني عانيت بأزمة مع اسمي، أنا حبيته وأشعر بامتياز الاسم الذي أعطاني من صفاته الكثير.
بس بالفضاء الافتراضي كان اسمي “آرام”.
رغم أن كثيرين فيما بعد كانو يشوفو اسمي كتير موسيقي بهيج وردة
لكن متل ما كان في مشكلة مع والدي باختيار الاسم أنا كمان كان عندي نفس المشكلة لما كانت زوجتي حامل ولسه ما عرفنا جنس المولود
أنا كان عندي رغبة أن يكون المولود الأول في عائلتي بنت
بطفولتي كتير سحرتني أسماء الفدائيين متل أبو تالة، وأبو دلال
أو أبو ليلى الشخصية الشهيرة التي أداها الراحل جوزيف صقر في مسرحية زياد الرحباني كان الها رنين كبير في أذني
ليش ما بيتكنى الرجل باسم ابنته البكر؟ حدا بيقلك: همّ البنات للممات. منطق غير منطقي بالأساس لازم يتغير.
بس كيف بدو يتغير إذا ما اشتغلنا عليه. ليش هم الصبيان ما بيرافق العائلة حتى الممات؟
بالحقيقة ما دخلنا بحوار الأسماء بشكل مباشر مع العيلة نظراً لوجودنا بالامارات والعيلة بسوريا.
بس مرة ع سكايب اختي الصغرى صوفيا، طرحت السؤال بشكل مباشر.
صوفي: رح تسمي ابنك ابراهيم إذا كان البيبي ولد؟
نادين طيلة شهور الحمل كانت بحالة إنكار انها حامل ببنت، واخترعت تسمية لطفل افتراضي في بطنها، وبحثت على النت حتى وجدت صورة له أيضاً، وسمّته كوكي.
نادين: هه فاق كوكي.. تعا شوف كوكي رفسني.
لما صار وقت موعد الفحص الدوري عند الطبيبة، ما قدرنا نعرف جنس الجنين لأنه كان في وضع لا يظهر ما بين رجليه.
-شو دكتورة طمنينا؟ / الدكتورة: الحقيقة مش واضح لسه وضعية الجنين لا تسمح إننا نشوف هو ولد والا بنت.
ضل كوكي بحياتنا، وصار تسليتنا واختراعنا. للحظة صدقت أو تواطئت مع حدس الأم، وكذبت حدسي كأب معقول يخيب حدس الأم؟
صار الموعد الثاني للاطمئنان على الجنين قبيل سفر نادين إلى سوريا لمناقشة الماجستير بيومها الأخير قبل انقضاء المهلة المحددة لها.
في ظل المأساة السورية والوضع الأمني غير المسبوق في مدينة حمص 2012.
نادين: مو معقول أن أسافر إلى سوريا دون أن نعرف جنس الجنين. وهيك كان.
الدكتورة: مبروك، بنوتة.. جنى.. / الدكتورة: وأنا كمان اسم بنتي جنى، وعمرها 4 شهور.
سبق اسم جنى حضورها بوقت طويل. من يوم ما التقينا انا ونادين سنة 2006 وهيي بتقلي بدي جيب منك بنت وسميها جنى.
ولما نشرت كتاب شعر كان عنوانه “أخفي الأنوثة”، كانت القصيدة التي فيها اسم جنى، وهاد كان سنة 2010.
أي قبل زواجنا بسنة.
نادين: «سأنجب وردة/ وأسميها جنى الحقل/ وسيأتي المخاض في لحظة شتاصيفية/ فإله على الأرض/ لا بد سيصنع العجائب/ لأنه …/ كما في السماء كذلك على الأرض».
بعد فترة كبرت جنى وصارت تروح عالكي جي وان، وبعد شوية عوارض صحية مباغتة صارت لنادين اكتشفنا انها حامل.
وبمنتصف الشهر الثاني، وبعدما اطمنا على وضعها، رجعت مشكلة الاسم من جديد، ورجعت التساؤلات عن نوع الجنين واسم الجنين مرة تانية.
سنة 2017 انتقلت عيلتنا الصغيرة إلى مونتريال، قبل شهر من ولادة الطفل الثاني في عائلتنا.
بس قبلها ب 3 شهور كان بابا وماما عنا بزيارة بالشارقة، وبإحدى الجلسات المسائية الحميمة، كنت عم دور ع فرصة مناسبة حتى خبر بابا بالاسم اللي اخترناه للجنين.
كانت زوجة صديقي أنجبت وسمو الطفل: أخيل. أووه اسم عظيم قال الوالد.
في الفترة ما بين اكتشاف الحمل ووصول أهلي إلى الشارقة كنا عم ندور ع اسم ثلاثي الحروف، وكان أكثر الأسماء حظوة لدينا هو “مدى”، مثل جنى كاسم ثلاثي.
لكن أثناء رحلة البحث خطر ببالي اسم جول، على اسم أحد أبطال طفولتي: جول جمال.
ولما دورت ع معنى الاسم وأصله، تبين أن الاسم فرنسي ويعني الصديق أو الحبيب بالفرنسية، بس لقينا ان الاسم الو أصل عربي والجول هو العقل، وهو الحجر الذي تقام عليه البئر.
كل هي المعلومات كنا لسه ما شاركناها مع حدا من العيلة، بس لما اجت سيرة اسم عظيم متل اسم أخيل، لقيتها فرصة مناسبة لاستعراض الاسم المختار.
وقتها قلتلو لبابا: مو بس هني بيختارو اسم عظيم، كمان نحنا عنا اسم عظيم.
سألني شو الاسم.
قلتلو: جول. على اسم جول جمال.
أوووه اسم عظيم. علق الوالد. وقال الله يبعتلو أيام حلوة ويكون عظيم متل جول جمال.
بس لما صار موعد الولادة كان عنا قرار مختلف متعلق الاسم. وهوي كيف منكتب الاسم.
أنا كان رأيي انو نكتب الاسم بالفرنسي Jules، وهيك بيكسب جول المعنى باللغتين الفرنسية والعربية.
بس نادين كان الها وجهة نظر مختلفة وهيي أنو جول اسم عربي ورح يكتب بحروف أجنبية Joul، وهيك صار.
وصرنا لما حدا يسألنا نشرحله الحكاية وبالنهاية نقول الاسم بالفرنسي مشان يفهمو منيح، خصوصا لحدا أصلو فرنسي -على اعتبار أننا نعيش في المقاطعة الفرنسية بكندا.
هيك أنا بكون خلصت حكايتي مع الأسماء، وماني مضطر فكر بأسماء جديدة لأنو خلص قررنا انو بيكفي. الحمدلله.
الله يطعمن لكل مشتهي ويخلي كل الأولاد. بس إذا متردد وحابب تفكر تسمي اسم مختلف لابنك أو بنتك خبرني لسه في عندي كتير.
كان اختيار اسم لطفليّ من أصعب الاختيارات في حياتي كأبّ. كل المُسلّماتِ المجتمعية التي تمرّدت عليها، وكل العادات والكليشيهات التي تناولتها بالسخرية أو بالتجاهل، تجمهرت (لحظة إعلان الاسم) لتتفرج على نتيجة اختباري المجتمعي في انتقاء يعكس كل ما آمنت به. ربما أتحدث عن الموضوع بطريقة تشير إلى حلبة مصارعة، لا إلى اختيار اسم لطفل. لكن برأيي الموضوع يستحق، ولا يتعلق فقط بأغنية لفيروز تقول «أسامينا وشو تعبو أهالينا».
